Имрӯз дар шаҳри Истанбули Ҷумҳурии Туркия ҷаласаи коршиносони байналмилалӣ дар мавзӯи “Роҳандозии шабкаи ҳушдори аввалия дар самти муқовимот бар зидди терроризм барои кишварҳои Осиёи Марказӣ ” оғоз гардид.
Чорабинии мазкур бо суханронии ифтитоҳии Намояндаи махсуси Маркази минтақавии СММ оид ба дипломатияи боздоранда барои Осиёи Марказӣ хонум Наталия Герман ва Директори Дафтари зиддитеррористии СММ Доктор Ҷаҳонгир Хон ифтитоҳ гардид.
Баъдан намояндагони раёсатҳои марбут ба муқовимат бар зидди терроризм аз мақомоти дахлдори кишварҳои Осиёи Марказӣ бо мавқегирӣ аз кишварҳои худ оид ба вазъи кунунии равандҳои сиёсию амниятии минтақаи Осиёи Марказӣ ва таҳдиду хатарҳои мавҷуда дар ин минтақа суханронӣ намуданд.
Ҳамчуни ҳамоҳангсозони доимии СММ дар кишварҳои Осиёи Марказӣ оид ба корҳои амалӣ, тадбирҳои андешидашуда ва ҳамкориҳои муштарак бо кишварҳои минтақа дар самти мубориза бар зидди экстремизми хушунатомез ва терроризми байналмилалӣ баромад намуданд.
Дар бахшҳои «Таҳлил воқеаҳои дохилӣ дар Афғонистон», «Амнияти сарҳад, назорат сарҳадӣ ва таҳдидҳои аз Афғонистон бароянда» ва «Буҳрони башардӯстона дар Афғонистон ҳамчун таҳдид ба суботи минтақавӣ» Муовини директори Маркази тадқиқоти стратегии назди Президенти Ҷумҳурии Тоҷикистон Парвиз Муҳаммадзода ва дигар коршиноси кишвар бо таҳлилҳои ҷолиб суханронӣ намуданд.
Тибқи барномаи чорабинӣ аз сохторҳои марбутаи Ҷумҳурии Тоҷикистон оид ба муқовимат бар зидди терроризм, сардори Раёсати мубориза бар зидди ҷиноятҳои муташаккили Вазорати корҳои дохилӣ Шодӣ Ҳафиззода бо суханронии пурмуҳтаво баромад намуда, оморҳои мушаххас ва ҷолибро дар самти мубориза бар зидди экстремизми хушунатомез ва терроризми байналмилалӣ ироа намуд.
Ёдовар мешавем, ки чорабинии мазкур бо ташаббуси муштараки Маркази минтақавии СММ оид ба дипломатияи боздоранда барои Осиёи Марказӣ ва Дафтари зиддитеррористии СММ дар чаҳорчӯби лоиҳаи “Ба сӯи татбиқи ҳамаҷонибаи Стратегияи ҷаҳонии зиддиттеррористии СММ дар Осиёи Марказӣ – марҳилаи 4 доир ” баргузор гашт.
Мақсад аз баргузории ин ҳамоиш тавсеаи ҳамкорӣ ва ҳамоҳангӣ миёни сохторҳои қудратӣ, сохторҳои марбут ба муқовимат бар зидди терроризм, коршиносон, намояндагони созмонҳои минтақавӣ ва байналмилалӣ, инчунин механизмҳои минтақавӣ дар самти муқовимат бар зидди терроризм ҷиҳати коркарди шабкаи ҳушдори аввалия дар сатҳи миллӣ ва минтақавӣ ҳамчун платформа барои баланд бардоштани иқтидор ва коркарди стратегияҳои зиддитеррористии самарабахш ва андешидани тадбирҳо барои вокуниши созгор бар зидди таҳдиду хатарҳо ба амният ташкил медиҳад.
Бояд қайд намуд, ки дар кори ҳамоиш намояндагони Маркази минтақавии СММ оид ба дипломатияи боздоранда барои Осиёи Марказӣ ва Дафтари зиддитеррористии СММ, намояндагони дигар созмонҳои минтақавӣ ва байналмилалӣ, олимону пажӯҳишгарон, коршиносони масъалаҳои сиёсию амниятӣ аз марказҳои зеҳнии минтақавӣ ва намояндагони раёсатҳои марбут ба муқовимат бар зидди терроризм аз мақомоти дахлдори кишварҳои Осиёи Марказӣ иштирок намуданд.
Ҷониби Тоҷикистонро дар конфронси мазкур олимону таҳлилгарони Маркази тадқиқоти стратегии назди Президенти Ҷумҳурии Тоҷикистон, Вазорати корҳои хориҷӣ, Вазорати корҳои дохилӣ ва дигар сохторҳои мартбут ба муқовимат бар зидди терроризм аз мақомоти дахлдори кишвар намояндагӣ менамоянд.
Маркази матбуотии
Маркази тадқиқоти стратегии назди
Президенти Ҷумҳурии Тоҷикистон
